La Estaya de la Llingua d'Avilés celebra'l 8-M con un curtiu documental sobre Manuela Sáenz

La ecuatoriana foi hai dos sieglos una de les pioneres del feminismu n'América Llatina.

La Estaya de la Llingua d'Avilés entama esti primer semestre del 2021 dellos conteníos y actividaes pa celebrar cuatro feches especiales del añu. La primera ye'l Día Internacional de la Muyer, el 8 de marzu.

En collaboración con PlayPresta asoleyó güei un curtiu documental entituláu 'Manuela. La hestoria d'una heroína escaecida' dedicáu a la figura de la ecuatoriana Manuela Sáenz de Vergara y Aizpuru (1797-1856) "que participó y encabezó los movimientos emancipadores llatinomericanos, desobedeciendo los esquemes sociales de la época, impuestos pola moral tradicional y el patriarcáu milenariu", apunten dende'l serviciu de normalización llingüística avilesín. Nel mesmu participen Pilar Sánchez Vicente, Arantza Margolles y Jennifer Berrocal.

La siguiente, el 22 d'abril

El Día Internacional de la Madre Tierra, el 22 d'abril, ye la próxima xornada pa la que se ta preparando actividaes. Nesti casu la idea ye dar a conocer un espaciu emblemáticu de la redolada d’Avilés, como son les dunes de L’Espartal, l’espaciu dunar más llargu d’Asturies.

Completen esta propuesta'l Día de les Lletres Asturianes, el 7 de mayu, con una llectura por parte d'autores de la zona de testos d'escritores avilesinos, y el Día Mundial del Mediu Ambiente, el 5 de xunu, con una actividá colos árboles más emblemáticos del parque Ferrera. Les propuestes son pa tou tipu públicu y van poder siguise nes redes sociales del Conceyu d’Avilés, la web de la Estaya de la Llingua, la revista dixital de la Fundación Municipal de Cultura y la plataforma dixital Playpresta.