La esposición 'Mitos asturianos' aporta al CIDAN

La serie de pintures sobre la mitoloxía asturiana obra de Javier Iván Villa, que pudieron disfrutar recién los escolinos y escolines del IES Juan José Calvo Miguel de Sotrondio y en La Pola Siero, pue visitase agora en La Pola Llaviana. Va tar espuesta nel CIDAN hasta'l día 25.

Esta amuesa presenta pintures de dellos seres mitolóxicos, toes elles acompañaes d'un testu esplicativu sobre la figura representada. A ello hai que sumar un videu xeneral sobre la mitoloxía asturiana que sirve a los visitantes p'averase más a esta temática, amás d'una serie de xuegos.

'Mitos asturianos' espúsose nel FEMEX y na Casona del Bravial, en Samartín del Rei Aurelio, nun primer momentu'l branu pasáu. Nesti tiempu percorrió dellos puntos del país, como Uviéu, Candás o Lluanco. Nel Centru d'Innovación y Desarrollu Altu Nalón (CIDAN) estrenóse'l llunes y hasta'l día 25 va tar abiertu al públicu.