La esposición ‘¡Menuda Asturias!’ abre’l III Ochobre Folk

|
La esposición ‘¡Menuda Asturias!’ abre’l III Ochobre Folk

El Grupu Folclóricu Prau Llerón de Mieres entama la tercer edición del Ochobre Folk, que dio oficialmente aniciu esti llunes cola inauguración de la muestra ‘¡Menuda Asturias!’. La espicha y la Nueche en Danza del sábadu ye l’actividá principal d’esti festival de baille y música tradicional.

La Casa la Cultura Teodoro Cuesta acueye la esposición ‘¡Menuda Asturias!’, de l’Asociación Tradicional Rixu, que va tar abierta al públicu hasta’l domingu n’horariu de 12 a 14 hores y de 17 a 21 hores. Nella refléxense, al traviés de miniatures y muñeques, tradiciones y cultures asturianes.

L’actividá central del III Ochobre Folk va desendolcase de vienres a domingu, comenzando a les 17 hores con un Cuntacuentos pa neños y neñes, ‘Los cuentos del sol’, nel Teodoro Cuesta, a lo que va siguir, a les 18 hores, la charra didáutica ‘Vistíos d’asturianos’, a cargu de Fe Santoveña. L’actividá va pasar, de magar les 20.30 hores a El Requexu, onde va prebase la ‘Tapa l’Ochobre’ y va haber cantares de chigres nes sidreríes de la zona. Un conciertu de La Bonturné, a les 23 hores, va zarrar la xornada.

Entraes pa la espicha

Los xuegos tradicionales van abrir al meudía la programación del sábadu nel colexu Aniceto Sela. Llueu, a les 13 hores, va entamase un taller d’aniciu al baille tradicional impartíu Luis Ángel Fernández Santos.

A les 17.30 hores va tener llugar un desfile pela cai Manuel Llaneza de los grupos participantes na Amuesa de Folclor (18 hores, Teodoro Cuesto), esto ye, Los Neños del Prau Llerón, Vezos Astures, el Grupo Folklórico Surco (Salamanca) y Prau Llerón. Esta actividá va preceder a la gran espicha nel Aniceto Selo (21 hores), que tien un preciu de 12 euros si se merca enantes de güei nel chigre L’Abellugu o se reserva nel númberu de teléfonu 696.526.707. El preciu posterior va ser de 15 euros.

Tres la espicha va celebrase la Nueche en Danza cola participación d’Herbamora y L’Andecha Turcipié. Tamién habrá escenariu llibru hasta les 3 de la madrugada, cuando va tener llugar una danza prima y una chicolatada.

Alcuentru col Folclor

El domingu, xornada cabera del III Ochobre Folk, los eventos céntrense na plaza El Requexu, con una exhibición de rana a cargu de les peñes La Turonesa y Tudela Güeria (12 hores) y un Alcuentru col Folclor.

Contador Estadistiques