La esposición ‘Asturies n’otra dómina: la ropa’ llega a Carreño

La muestra del Grupu de Baille Tradicional San Félix de Candás sobre’l traxe tradicional asturianu, de nome ‘Asturies n’otra dómina: la ropa’, llega a Carreño. Esta esposición forma parte de los actos del trenta aniversariu de la formación.

El vienres, a les 20.15 va celebrase la inauguración oficial de ‘Asturies n’otra dómina: la ropa’ con un conciertu de música tradicional na Casa la Cultura de Candás, lllugar qu’acueye esta esposición que va amosar “copies de traxes tradicionales sofitaes en documentos gráficos, testuales y orales, d'aquella manera de vistir, tanto de la xente  que trabayaba la tierra como de la xente que trabayaba la mar”, espliquen dende’l grupu de baille, que recuerda que se centra na ropa que llevaben los nuesos antepasaos nos sieglos XVIII y XIX. Esta muestra llega a Carreño tres pasar per Cangas del Narcea mientres la Universidá Asturiana de Branu (UABRA) qu’entama l’Academia de la Llingua Asturiana.

L’horariu de visita de la esposición, que va tar abierta al públicu hasta’l 30 d’ochobre, ye de 19 a 21 hores, de llunes a sábadu, y de 12 a 14 hores y de 18 a 21 hores, los domingos. El Grupu de Baille San Félix ufre visites guiaes los díes 18, 19, 21 y 25, a les 19.30 hores. Otra manera, pal vienres 25 ta previsto un conciertu de música tradicional nuevu a les 20.15 hores.