La esperiencia del Sella va llevase a otros ríos

Depués d'años de pesca del salmón y d'otres especies, el fondu del Riu Sella taba tresmáu de chombos, los plominos que se ponen nes cañes de pescar. Como metal pesáu que ye, el plombu ye ún de los materiales más contaminantes que suelen alcontrase nos ríos. Con motivu d'esto, l'Asociación Océano Alfa, dedicada a la difusión, conservación y Investigación del mediu, echó a andar el proyectu Ríu Sella 2002 col oxetivu de recuperar los chombos que tan nel fondu del ríu Sella y tamién investigar en materiales alternativos pa sustituyir esti metal.La cosa entamó na seronda del 2.001, cuando la productora de documentales The Animal's House taba rodando un documental nel ríu y l'equipu de grabación decatose de la cantidá de plombu qu'había metío en ríu, decidiendo la xente de la productora echar a andar un proyectu pa desaniciar lo que se pudiere y concenciar sobre esti asuntu. Como'l plombu nun hai más manera de sacalo que a mano y amás da bastante guerra en cuantes que depués d'un tiempu los chombos queden tapaos en capes enterraes hasta en mediu metru de basa y arena, los cerca de 400 kilos de plombu que salieron n'acabando'l llabor de llimpieza nun puen calificase menos que de trunfu, anque a los responsables del proyectu, que se centró namás nun pozu del ríu, abúlta-yos qu'entovía puen quedar sobre 200 tonelaes más de metal pesao en ríu, y qu'otros ríos asturianos como'l Narcea o'l Cares ye fácil que tean por un estilo. La iniciativa quieren llevala agora a otros ríos asturianos y d'otros países.