La esperanza de vida de los asturianos xube hasta pasar los 79 años

La esperanza de vida al nacimientu n'Asturies aumentó en 4,95 años, pasando de los 74,81 de 1981 hasta los 79,76 del 2005, según les últimes tables de mortalidá nel nuesu país calculaes pol Institutu Nacional d'Estadística (INE) y espardíes nun comunicáu.


A nivel nacional, la esperanza de vida al nacimientu n'España aumentó en más de dos años ente 1995 y 2005 hasta superar los 80 años, según l'Institutu Nacional d'Estadística (INE). Los datos espeyen una disminución de les tases de mortalidá --sobre tou ente los más mayores-- y un descensu de les probabilidaes de muerte a cada edá, amás de confirmar que la esperanza de vida de les muyeres sigue superando en más de seis años a la del home.


Nel 2005, la esperanza de vida de los españoles asitióse nos 80,23 años, con una diferencia de 6,25 años ente les muyeres (83,48 años) y los homes, que teníen la so esperanza de vida nos 76,96 años. La esperanza de vida del 2005 supera en casi un añu (0,79) les espectatives que se rexistraron nel 2001 --79,44 años pa la población en xeneral, 82,82 pa les muyeres y 76,07 pa los homes-- y en más de dos años (2,12) les rexistraes pa tola población en 1996, cuando la esperanza de vida asitióse nos 78,11 años, 81,70 pa les muyeres y 74,53 pa los homes.