“La especie necesita una fonte de faisanes monteses esterna pa torgar el desaniciu”, asegura Suárez

N’Asturies namái queden 40 exemplares de faisán montés cantábricu, una cantidá qu’aumenta hasta los 200 si se sumen tamién los censaos en Lleón. La veterinaria María Suárez Álvarez participó esti martes na conferencia d’Ástura sobre la fauna salvaxe asturiana, dedicando una parte importante a esta especie concreta, que podría desaniciar en 5 o 10 años y que “necesita un fonte de faisanes esterna” pa torgalo.

Especializada n’animales salvaxes, dedicó gran parte de la so intervención nel Atenéu Obreru de Xixón, entitulada 'La fauna salvaxe n'Asturies y el trabayu veterinariu', n’esplicar cuál ye’l llabor d’estos profesionales, pa lo que s’apoyó de numberoses imáxines. Dada la so esperiencia de trabayu col faisán montés –tamién nomáu gallu montés– a lo llargo de 15 años, especialmente dende'l proyeutu de cría en cautividá que se desendolca nel centru de Sobrescobiu, detalló numberosos aspeutos y comportamientos d’esta especie autóctona, asina como los métodos qu’empleguen pa radiomarcalos y estudialos.

Animó a salir al monte a ver exemplares y dio recomendaciones: “Hai que saber ónde dir, y dir en silenciu y colos güeyos abiertos”, anque reconoció que tamién ye “cuestión de suerte”. Más teniendo en cuenta los pocos faisanes monteses que queden, 40 n’Asturies y 200 en total sumando los de Lleón, según un censu xenéticu fechu nel 2020.

Una situación mui esmolecedora que lleva a Suárez a afirmar que “de siguir asina la especie podría desaniciar en 5 o 10 años”. ¿Cómo se podría torgar esta perda? “Necesita una fonte de faisanes monteses esterna”, que podría venir “de los centros de cría en cautividá”, con esperanza nos resultaos “prometedores” del segundu centru esistente, abiertu l’añu pasáu en Lleón, depués de que les criances y la suelta del de Sobrecobiu nun algamaren ésitu; o “reforzándola con otres poblaciones” como’l faisán montés pirenaicu, “pero yá nun seríen cantábricos” al esllir la so xenética.

Lo cierto ye que’l tiempu cuerre y otros factores esternos, como’l cambiu climáticu, tampoco nun ayuden. La toma de decisiones ha ser rápida pa salvar una especie autóctona mui afeutada pola caza ensin control fecha na década de los 70 que llevó a un amenorgamientu progresivu de la población hasta’l puntu de qu’anguaño “la muerte d’un exemplar supón perder un 0,5 por cientu del total”.

Na semeya, Amadéu Benavente, d'Ástura; y Suárez Álvarez.