La especialidá y la retirada de los recursos contra les ordenances, ente los pidimientos d’Iniciativa a Sánchez

|
Pedro Sánchez

El cambiu de Gobiernu nel Estáu, tres la moción de censura a Mariano Rajoy que dio la presidencia Pedro Sánchez, lleva a Iniciativa pol Asturianu a treslladar per carta dellos pidimientos al socialista. Ente ellos ta la creación de la especialidá, le retirada de los recursos a les ordenances o’l cumplimientu de la toponimia.

Nel testu unviáu a Sánchez destaca la vieya demanda de maestros y sindicatos educativos, y ún de los oxetivos del Gobiernu asturianu pa esta llexislatura, bloquiada dende Madrid pol Partido Popular (PP). Iniciativa pol Asturianu recuerda qu’esta midida “nun tien nengún costu y permitiría que’l profesoráu d’asturiau dexe de ser interín de forma indefinida y puedan convocase places per esta especialidá nes oposiciones”.

El coleutivu tamién demanda que la Delegación de Gobiernu estatal n’Asturies retire tolos recursos contra los reglamentos de los conceyos pa la normalización y l’usu del asturianu puestos con Gabino de Lorenzo al frente, asina como’l cumplimientu de la toponimia oficial, que yá ye la tradicional en 60 de los 78 conceyos asturianos. Asina, debería visibilizase nes señales de les carreteres, nes estaciones de tren, nes páxines web de tola Alministración o nes campañes estatales, al igual que l’emplegu del asturianu néstes.

Completen estos pidimientos "de fácil solución" la busca d’una fórmula pa que l’Academia de la Llingua Asturiana reciba financiación estatal, al ser la única entidá d’esti tipu que nun la tien, y que’l Ministeriu d’Educación y Cultura incluya l’asturianu nos premios estatales de lliteratura y n’otres munches iniciatives, como pue ser la so difusión al traviés del Instituto Cervantes.

Contador Estadistiques