La escuela pública movilízase n'Uviéu

La Plataforma Estatal por la Escuela Pública entama una convocatoria pola paralización de la Subcomisión pal Pautu Educativu y los recortes del Executivu del Partido Popular.

Nel país la movilización cuerre a cargu de la Plataforma por la Escuela Pública de Asturias, conformada por SUATEA, CC OO, UXT, la FAPA Miguel Virgós y el Sindicatu d'Estudiantes, tando convocada una concentración a les 18 hores d'esta tarde frente a la Delegación del Gobiernu estatal n'Asturies. La razón principal d'esta protesta ye denunciar la paralización de la Subcomisión d'Educación pal Pautu Educativu, "una cortina de fumu pa evitar que la comunidá educativa falara sobre les necesidaes reales de la escuela pública y esixera a los diferentes grupos parllamentarios propuestes contundentes pa defendela".

L'escenariu actual, según señalen los convocantes, ye'l mesmu que'l d'enantes, nel que "les contrarreformes del PP y la LOMCE siguen vixentes, como tamién lo tán los recortes sufríos pola escuela pública, que nun se revirtieron". Poro, esíxese nesta movilización un mayor financiación de la Educación, un llei nueva consensuada cola comunidá educativa, la reversión de los recortes (baxada de ratios, recuperación de programes d'atención a la diversidá, reducción d'hores llectives pal profesoráu, l'aumentu de la plantiya docente y la supresión de los descuentos por enfermedé) y más beques y ayudes al alumnáu.