La Escuela d'Entamadores y Empresaries punxo formación a 67 muyeres

Catorce proyeutos de les participantes nel 2018 yá tán operativos y trenta, en procesu.

La direutora xeneral del Institutu Asturianu de la Muyer y Polítiques de Mocedá, Almudena Cueto, presidió ayeri la comisión de siguimientu de la Escuela d'Entamadores y Empresaries d'Asturies, na que s'analizó'l balance de resultaos del añu pasáu. La entidá atendió nel exerciciu últimes a 95 nueves usuaries, de les que 74 decidieron empecipiar el desenvolvimientu de la so idea empresarial, rematándose un total de 44 iniciatives, de les que 14 tán yá operatives, y impartió formación completa a 67 muyeres.

La escuela punxo cuatro cursos de formación pa la creación d'empreses n'Avilés, Les Arriondes, Cangas y Cabranes, y otros trés para l'afitamientu en La Pola Siero, Navia y Valdés. Amás, desendolcó per primer vegada una aición pa facilitar la maduración d'idees de negociu denominada 'Maratón pal entamu'.

Tamién ufiertó orientación pal fomentu de midíes y planes d'igualdá a nueve empreses y impulsó la campaña de conciliación 'La xestión de la vida llaboral, personal y familiar: con corresponsabilidá creemos valor y construyimos futuru', na que se contautó con 200 compañíes asturianes y se visitaron 53 pa facer un diagnósticu de la so situación.

Por último, la entidá participó en 32 actividaes entamaes por otres organizaciones y xestionó 23 aiciones de formación y sensibilización nes sos propies instalaciones, centraes en temátiques d'igualdá, entamamientu y emplegu.