La Escuela de Formación Permanente Clara Campoamor dedica una xornada a la reforma del Estatutu

‘Falemos del Estatutu d’Autonomía’ ye’l nome de la xornada qu'entama esti sábadu pola Escuela de Formación Permanente Clara Campoamor, venceyada a Podemos. Los inscritos van poder siguila en llinia y nella tomen la pallabra Penélope Miranda, Xune Elipe, Francisco Javier García Valledor o Inaciu Galán xunto con espertos de fuera d’Asturies.

El primer tema a tratar va ser ‘Una visión de los estatutos d’autonomía a nivel estatal’, cola participación del escritor y periodista Galán; Jaume Bosch, abogáu y ex diputáu en Catalunya por En Comú Podem; Encarna Carmona, profesora titular de Derechu Constitucional na Universidad de Alcalá; Lander Martínez, analista políticu y ex parllamentariu vascu; y Bárbara Biagioli, graduada en Mediación Llingüística pola Università per Stranieri di Siena. Va principiar a les 11 per Zoom, como tola xornada de formación, cola necesidá d’inscribise pa poder siguir les intervenciones.

Llueu, a les 12.15 hores, va tratase’l tema ‘¿Qué retos tenemos per delantre col Estatutu d’Autonomía d’Asturies?’. Nesti alderique van tomar parte Elipe, cantante y responsable de Goxe Producciones; Miranda, cabezalera de l’Asociación de Trabayadores de la Normalización Llingüística; el ex conseyeru Valledor; el doctor n’Historia, Pablo M. Testa; y Silvia Fernández, téunica superior en Promoción de la Igualdá de Xéneru.