La escavación del xacimientu de Los Castros permite recuperar monedes, cerámica y un cachu de molín

|
Berta Piñán na zona de Los Castros

El xacimientu de Los Castros, en Degaña, escavóse per primer vegada, actuación enmarcada nel Plan Direutor pa la Xestión del Patrimoniu Castreñu d’Asturies. Los trabayos permitieron recuperar un cachu de molín, cerámica y monedes, y van completase cola instalación de paneles informativos que faciliten l'accesu y reconocimientu.

L’actuación conllevó la eliminación de la vexetación que lu cubría, l’análisis exhaustivu del recintu y de les estructures defensives y una aproximación al so contestu cultural y cronolóxiu per aciu de dellos sondeos arqueolóxicos. Les pieces atopaes nél permiten probar la ocupación del conxuntu castreñu de la Edá del Fierro, que domina un estensu tramu d’El Ríu Ibias, polo menos hasta la época romana, confirmando la importancia del valle de Degaña na salida del oru hacia Asturica Augusta (Estorga), según apunten dende la Conseyería de Cultura, Política Llingüística y Turismu.

En total, destináronse a esta escavación 27.757 euros. Les xeres van complementase cola instalación de dellos paneles informativos que faciliten l’accesu y reconocimientu de Los Castros.

“Representa un avance nel conocimientu sobre la nuesa cultura castreña y un esfuerzu por garantizar la so conservación afayadiza”, apuntó sobre l’actuación la conseyera Berta Piñán, que visitó esta mañana’l llugar en compañía del alcalde Óscar Ancares. Tamién acudió a ver les obras de conservación de la ilesia de Santa María de Zárreu y el recién restauráu conxuntu escultóricu de Casa Florencio.

Na semeya, Piñán recibe esplicaciones sobre l'actuación en Los Castros, na lladera n'altura, dende la carretera.

Contador Estadistiques