La entrega del XX Premiu Xeira de Narracióis Curtias va celebrase n’A Caridá’l 15 d’abril

L’auditoriu municipal de Casa das Quintas, n’A Caridá, va acoyer el 15 d’abril un actu lliterariu nel que va entregase'l XX Premiu Xeira de Narracióis Curtias. Esti añu la ganadora ye Alba González Fernández col so relatu ‘Hiperhidrosis’.
 
L’actu d’entrega d’esti premiu creáu hai venti años pa promocionar l’usu lliterariu del gallego-asturiano va principiar a les 20 hores y va servir d’entamu pa una serie d’actividaes programaes pola Asociación Cultural Xeira nes que va participar Consuelo Vega, direutora xeneral de Política Llingüística. La primer d’elles va ser la presentación del libru ‘Máis lletras novas’, que recueye los últimos diez cuentos ganadores del Premio Xeira y que coediten esti coleutivu y la Conseyería de Cultura y Turismu. “Trátase d'úa continuación del obra editada hai dez anos, Lletras novas, unde se recoyían os dez primeiros ganadores”, señalen dende Xeira.
 
La xornada lliteraria va continuar con otra presentación, nesti casu del tercer númberu de ‘Trabatel. Revista eonaviega de lliteratura’, qu’edita la conseyería y qu’inclúi prosa y poesía, amás de les reseñes de les publicaciones últimes en gallego-asturiano. Por último, el cuartetu folk Moxega va zarrar l’actu lliterariu con una actuación na que van interpretar poemes musicaos y tornaos al gallego-asturiano d’autores como Lorca, Goytisolo o Miguel Hernández.