La entrega de los Premios Timón quedó desllucida pola descoordinación de la Fundación Municipal de Cultura

Un error de la Fundación Municipal de Cultura, Educación y Universidá Popular de Xixón perxudicó la gala d'entrega de los Premios Timón, celebrada dientro del Festival Arcu Atlánticu. Ésta foi más curtia de los previsto y impidió l'actuación de Taranus.

La cita taba prevista pa les 13 hores nel Escenariu Atlánticu pa entregar a Esther García López (X Premiu Timón, p'autores n'asturianu y gallego-asturiano), Pilar Sánchez Vicente (VII Premio Timón, p'autores asturianos en castellanu) y Ramón d'Andrés (IV Premiu Timón de Cultura Asturiana) los sos gallardones –nel casu d'ésti últimu acudió a recoyelu'l so hermanu Efrén, collaborador d'Asturies.com–, una figura cerámica obra de Jesús Castañón, pero un alcuentru de gaiteros impidió que se pudiera facer a la hora. Nun sería hasta 45 minutos más tarde cuando l'actu pudiera iniciase, impidiendo asina que Taranus pudiera facer la so actuación prevista.

"Esta suspensión vieno motivada por una descoordinación en dientro de la FMCE xixonesa, que nun se decatare de lo publicao nel programa del Festival y allugare na carpa del Escenariu Atlánticu otra actividá –entendemos qu’en principiu yera un pasacais– que debiere finar enantes de les 13 hores. Xunto a ello diose la non anuncia a la empresa responsable del soníu de la realización d’esti conciertu de Taranus, y qu'esta empresa tuviera na axenda’l desmontaxe de les sos instalaciones na carpa nun tiempu que torgaba toa intervención musical como la que necesitaba’l grupu", espliquen dende l'Asociación Cultural L'Arribada, entidá qu'entrega tolos años los Premios Timón y qu'entama la estaya Arcu Lliterariu del Festival Arcu Atlánticu.

Tres llamentar la situación na que s'atoparon los miembros de Taranus y esponer "el nuesu disgustu consiguiente al topanos con un actu, pa nós mui importante, como ye la entrega de los premios qu’entamamos pa reconocer trayectories lliteraries y pola cultura de xente asturiano, y que resultó amenorgáu na fechura plantegada", L'Arribada esixe una compensación a la banda de folk-metal: "Aguardamos que dende la FMCE sepan iguar esti erru y ufierten-y la meyor compensación al grupu Taranus, a ser posible en forma de conciertu nun espaciu y horariu destacaos".