La encuesta preeleutoral del CIS nun pronostica cambios n'Asturies

Too siguiría igual. La entrada n'escena de la coalición Xuníos Podemos nun traería cambios n'Asturies, con victoria pa PP-Foro, que mantendría los sos 3 escaños. A nivel estatal sí habría sorpresa, col 'sorpasso' de Xuníos Podemos al PSOE en votos y escaños, anque'l trunfu sería pal PP.

La coalición del Partido Popular y Foro ganaría les eleiciones n'Asturies al sumar 3 de los 8 diputaos que-y correspuenden al país nel Congresu. Caltendría 2 el PSOE y nun consiguiría l'oxetivu de quita-y ún al PP Xuníos Podemos, coalición eleutoral na que tamién participen EQUO, Izquierda Asturiana (IAS) y Compromisu por Asturies, ente otros. Ciudadanos, mentes, siguiría sumando un escañu.

La estimación de votu, tres la cocina fecha pol Centru d'Investigaciones Sociolóxiques (CIS), da'l trunfu nes eleiciones estatales del 26 de xunu al Partido Popular (PP), que suma un 29,2 por cientu de los votos, cifra mayor que na encuesta d'avientu (28,6 por cientu) y que nes eleiciones del 20-A (28,72 por cientu). D'esta forma algamaría ente 118 y 121, esto ye, menos que los 123 que tienen agora.

La segunda fuercia sería Xuníos Podemos –si sumamos toles coaliciones territoriales–, con un porcentaxe de votu del 25,6 por cientu y ente 88 y 92 diputaos, cuando na cita anterior sumó 69 (20,66 por cientu), como Podemos, y 2 como Unidad Popular (3,67 por cientu). D'esta forma, el PSOE veríase superáu pela izquierda, con una estimación de votu del 21,2 por cientu (el 20-A algamó el 22,01 por cientu) y ente 78 y 80 escaños (n'actualidá tien 90).

Coalición Canaria perdería'l so diputáu

Pela so parte, Ciudadanos perdería escaños pese a tener un mayor porcentaxe (14,6 por cientu por un 13,93 del 20-A), pasando de 40 a 38-39. Tamién algamaríen representación nel Congresu ERC (8-9; agora tien 9), Convergència (6-7; 8), EAJ-PNV (5; 6) y EH Bildu (3; 2). Mentes, perdería'l so diputáu Coalición Canaria.