La encuesta preeleutoral del CIS nun da la mayoría absoluta a CiU

El CIS dio a conocer los datos de la encuesta sobre intención de votu nes eleiciones catalanes anticipaes del 25-P. CiU medraría en representación, anque nun llegaría a la mayoría absoluta, y ERC sumaría 7 escaños más que nel 2010.

La encuesta da a Convergència i Unió (CiU) ente 63 y 64 escaños y un porcentaxe estimáu del 36,8 por cientu del total de los votos, cifra menor que na cita coles urnes del 28 de payares del 2010, cuando tuvo un 38,47 por cientu de los sufraxos y sumó 62 escaños que-y dio’l gobiernu del país mediterraneu. La segunda fuercia más votada sería’l PSC con 19 escaños (12,9 por cientu), lo que supondría una perda de 9 escaños, al igual qu’asocedió nes eleiciones últimes, cuando sumó un 18,30 por cientu de los votos. Pela so parte, el PP perdería un escañu –de 18 (12,37 por cientu) nel 2010 pasaría a 17 (11 por cientu)– y Iniciativa per Catalunya Verds-Esquerra Unida i Alternativa (ICV-EUiA) ganaría 1 –de 10 (7,37 por cientu) pasaría a 11 (8,1 por cientu)–.

Los crecimientos más destacaos los protagoniceríen Esquerra Republicana de Catalunya (ERC) y Ciutadans-Partido de la Ciudadanía. Los nacionalistes catalanes ganaríen 7 escaños al pasar de los 10 del 2010 (7 por cientu) a 17 (11,1 por cientu), mentes que la formación liderada por Albert Rivera tendría 4 escaños más: de 3 (3,39 por cientu) a 7 (6 por cientu). Completaría l’arcu parllamentariu Solidaritat Catalana per la Independència (SI), que perdería 3 escaños al pasar de 4 (3,29 por cientu) a 1 (2,1 por cientu), qu’algamaría en Girona.

Quedaría fuera del Parlament nel so debú nunes eleiciones nacionales la Candidatura d'Unitat Popular (CUP)-Alternativa d’Esquerres, con una estimación de votu del 1,6 por cientu, y Unión Progreso y Democracia (UPyD), con 0,7 por cientu, cifra que malpenes supera la del 2010: 0,17 por cientu.