La encuesta del CIS da como ganador de les eleiciones al PSOE, anque UPyD sería llave de gobiernu

El PSOE ganaría les eleiciones n’Asturies pese a perder un diputáu, según les estimaciones del CIS, y el PP superaría a Foro. Sicasí, los beneficiaos el 25-M seríen UPyD, con dos escaños, y Izquierda Xunida, que sumaría siete.
 
Los resultaos de la encuesta del Centru d’Investigaciones Sociolóxiques (CIS) dan al PSOE un total de 14 escaños (ún menos que’l 22 de mayu), al PP ente 11 y 12 (agora teníen 10) y a Foro 10 o 11, polo que sería la formación más perxudicada, yá que n’actualidá formaben Gobiernu gracies a los sos 16 diputaos. Mentes, Izquierda Xunida daría un saltu espectacular al pasar de 4 a 7 escaños, una cantidá que sería insuficiente pa entamar una coalición de gobiernu d’izquierdes, yá que namái sumaríen 21 escaños de los 45 de la Xunta Xeneral y quedaría too en manes d’Unión, Progreso y Democracia (UPyD), qu’entraría nel Parllamentu na so segunda intentona con dos diputaos.
 
Asina, los porcentaxes de los cinco partíos que tendríen presencia na Xunta Xeneral seríen los siguientes: PSOE, 28,2 por cientu; PP, 24 por cientu; Foro de Ciudadanos, 22,7 por cientu; Izquierda Xunida, 14,5 por cientu; y UPyD, 4,4 por cientu. Un 2,6 por cientu entraríen nel apartáu de ‘otros partíos’ y l’astención sería del 14,2 por cientu.
 
Na encuesta entamada pol CIS nesta ocasión nun entraba’l Bloque por Asturies-UNA-LV-GV –formación asturianista con más apoyos– ente la opciones, nes que sí taba Equo-Los Verdes d’Asturies. Sicasí, como referencia, hai que destacar que na entruga númberu 30, que preguntaba ‘Cómo se definiría Ud. en política, según la siguiente clasificación’, un 1 por cientu presentábase como nacionalista y un 3,3 por cientu como ecoloxista. La opción más votada nesti apartáu foi socialista (17 por cientu), siguida por conservador/a (16,9 por cientu) y lliberal (10,2 por cientu). Un 11,4 por cientu de los encuestaos nun supo definise.