La empresa Araz Net recibe esta tarde’l premiu “Andrés Solar”

La empresa Araz Net, matriz del diariu electrónicu Asturies.com recibe esta tarde'l premiu que la Xunta Pola Defensa de la Llingua Asturiana entrega añalmente dende 1985 a la persona o institución que más ficiere al favor del asturianu. L'actu va tener llugar a les 8 de la tarde nel Salón d'Actos del Antiguu Institutu de Xixón.

Al entamu del actu, abiertu al públicu, va haber un recital poéticu cola participación de Pablo Rodríguez Alonso, ganador de la última edición del Premiu de poesía Teodoro Cuesta y Pablo Texón Castañón, ganador del premiu Nené Losada de poesía. Darréu va actuar el dúu musical formáu por Ígor Medio y Lisardo Prieto, componentes del grupu folk xixonés Felpeyu.

La tradicional llectura del discursu col que la Xunta fai resume de lo que foi l'añu pa la llingua asturiana va dar pasu a la entrega de los premios. Fernando de la Fuente, xerente d'Araz Net, va recoyer el "pegoyu" o premiu positivu en reconocimientu a los diez años de vida de la empresa nos que desarrolló proyectos que tienen l'asturianu como protagonista y como llingua vehicular, con especial importancia Asturies.com y tamién otros como la tienda asturiana na rede Asturshop o'l proyectu Caveda y Nava, el buscador Úlos?, y l'Iguador de la Llingua Asturiana que son tamién oxetu del reconocimientu d'esti premiu.

Na otra parte, el premiu negativu o "madreñazu" a la persona o entidá más dañibles pa cola llingua nel 2005 dió-ylu la Xunta a José Ramón Pérez Ornia, Director Xeneral del Ente Públicu de Comunicación del Principáu d'Asturies.