La empresa Amazon abre tienda nel Estáu ensin referencies bibliográfiques n'asturianu

|

El xigante estauxunidense del ‘e-commerce’, Amazon, ta acabante d’abrir tienda nel Estáu, dalgo que va revolucionar el comerciu estatal. Ente la so ufierta amplia de productos de too tipu nun hai referencies bibliográfiques n’asturianu.
 
Cola llegada d’Amazon, el comerciu tradicional y electrónicu va vivir una revolución. Les tiendes y grandes superficies del primer sector, como FNAC, El Corte Inglés o Media Market, temen qu’esti xigante de venta ‘on line’ pueda influyir nes sos ventes, obligando-yos a ser más competitivos pa nun perder a los sos veceros, mentes que los segundos van ver como’l so mercáu, tovía nun asentáu nel Estáu, va sufrir un puxu enorme, dalgo que pue beneficialos si saben aprovechar la so oportunidá.
 
Amazon ye una tienda per Internet fundada en 1994 como llibrería y qu’agora vende too tipu de productos: películes, música, productos electrónicos y informáticos, videoxuegos, xuguetes y relós. Como nota negativa a la so llegada al Estáu, el xigante estauxunidense escaez la incorporación de referencies bibliográfiques n’asturianu mentes que sí ufre nel so catálogu llibros en catalán, eusquera y gallegu.
 
Amás de la llegada d’Amazon, pa feches próximes tamién s’espera l’aterrizaxe nel Estáu de Alice.es, tienda especializada en productos del hogar que promete aforros importantes de tiempu y dineru que va ser una competencia dura pa los comercios d’esti sector.

Contador Estadistiques