La economía asturiana nun esconsoña

El mesmu día en que'l paru baxó un 3,4% n'Asturies por aciu de la coyuntura estival, La Sociedá Asturiana d'Estudios Económicos y Industriales (SADEI) espubliza'l so informe de coyuntura correspondiente al mes de mayu. Pa la prestixosa entidá, anque los datos de mayu son "inconsistentes" sí valen pa diagnosticar que la economía asturiana sigue morriendo adulces y afondando na llinia de desaceleración que lleva de va tiempu. Sadei alvierte de lo engañoso de dellos indicadores que puen marcar lo contrario, como'l númberu de trabayadores afiliaos a la Seguridá
Social, que si medró un 4,1% foi por culpa de duplicidaes nel colectivu de la sanidá, afectáu pol trespasu competencial. Otramiente, anque se rexistra una meyora coyuntural del paru, na interanual xubió en 2.312 persones.Ente los sectores productivos, l'informe detecta que la construcción sigue tirando del carru, pero menos (la venta de cementu baxó'l 12,6%), anque cuenta con recuperase gracies a la licitación d'obra público, que yá va esti añu pelos 98 millones d'Euros, el 63% más que nel 2001. Nel campu, SADEI remarca que ´concueyaron el másimu de lleche comercializao cola mayor cayida de los precios a los ganaderos. La industria asturiana espeya un aceptable nivel productivu pol que tiren les rames d'enerxía eléctrica y el metal, anque "ensin abonda intensidá pa
marcar un cambeu de tendencia". Pela so parte, el sector servicios reforzose un poco al abrir la gran superficie nueva de Carrefour n'Uviéu, mientres que'l turismu, con un crecimientu mui pequeñu, sigue ensin cuayar.