La direición xeneral que s’encarga del asturianu va llevar el nome de ‘Política Llingüística’ y va crease un Conseyu Asesor

La nueva Conseyería de Cultura, Política Llingüística y Turismu va dar “un fuerte impulsu a la política llingüística, asumida como valor esencial y identitariu d’Asturies”. La estructura d’esti departamentu va caltener la direición xeneral, que pasa a llamase de ‘Política Llingüística’, y va crease un Conseyu Asesor de Política Llingüística.

Depués de la que llexislatura pasada dicha direición xeneral llevara’l nome de ‘Planificación Llingüística y Normalización’, con Fernando Padilla al frente, agora recupérase l’anterior de ‘Política Llingüística’. Va ser una de les trés de la conseyería xunto coles de ‘Cultura y Patrimoniu’ y ‘Deportes’, entamándose tamién una viceconseyería de Turismu, hasta agora direición xeneral xunto con con Comerciu dientru de la Conseyería d’Emplegu, Industria y Turismu.

Anuncióse d’igual forma la creación d’un Conseyu Asesor de Política Llingüística, ampliando asina la llista d’órganos d’asesoramientu formada pola Xunta Asesora de Toponimia del Principáu d’Asturies, el Conseyu de Patrimoniu Cultural d’Asturies, el Conseyu Asesor de Deportes del Principáu d’Asturies, la Comisión de Valoración de Bienes del Patrimoniu Cultural d’Asturias, la Comisión Asesora del Muséu Barjola y la Comisión d’Inversiones con cargu al ún por cientu cultural n’obres públiques. Una vegada aprobada la estructura de la Conseyería de Cultura, Política Llingüística y Turismu, asina como de les otres nueves restrantes, va procedese nestes próximes selmanes a anunciar los nomamientos correspondientes.

El primeru y únicu fechu hasta agora ye’l de Melania Álvarez García, responsable de la Conseyería de Derechos Sociales y Bienestar, como vocera del Executivu esta llexislatura.

Na imaxe, xunta del Conseyu de Gobiernu, cola conseyera de Cultura, Política Llingüística y Turismu, Berta Piñán, sentada nel primer llugar de la derecha. Semaya obra d'Armando Álvarez.