La directiva del Real Uviéu mandó retirar una pancarta a favor de la TV n’asturianu

La directiva del Real Uviéu ordenó ayeri la retirada d'una pancarta de la Xunta Pola Defensa de la Llingua Asturiana nos minutos enantes d'entamar el partíu de fútbol de segunda división B qu'enfrentaba al Real Uviéu y el Marino de Lluanco nel estadiu Carlos Tartiere.

La pancarta, con un testu reivindicativu al favor de la presencia del asturianu nes emisiones de la TV autonómica, que tresmitía l'alcuentru en directo, nun-y paeció gota bien a la directiva carbayona, que mandó al delegáu de campu del equipu acompañáu por un garapiellu d'axentes de policía pa retirar esta pancarta, que yá tuviera presente n'otra ocasión dientro del campu ensin causar nengún problema, anque la directiva uvieina torgó d'entós en p'alantre la entrada d'esta pancarta al estadiu. Según el testomoniu de los militantes de la Xunta l'encargáu del Real Uviéu, qu'arrincó la pancarta coles sos propies manes ente los xiplos y glayíos de parte del públicu, pidió-yos a los axentes de la policía nacional qu'identificaren a los portadores de la pancarta reivindicativa, cosa que los policíes refugaron por entender que nun procedía.

Dende la Xunta Pola Defensa de la Llingua espliquen que "La razón d'esti sucesu paez claramente determinada pol alcuerdu del R. Uviéu SAD cola canal autonómica pa la retransmisión de los partíos" y afirmen saber que "esistieron presiones per parte de la RTPA pa qu'esa pancarta nun apaeciere nos encuentros televisaos". La organización defende la presencia de la pancarta nel campu de fútbol en cuantes que nes normes del club pa l'accesu a los partíos, que puen vese impreses en toles entraes y abonos de socios dizse de manera concreta que "nun tán permitíes les pancartes que contengan símbolos, emblemes, lemes o lleendes q'impliquen incitación a la violencia", afirmando que nun ye'l casu de la pancarta retirada "que cenciellamente contenía una reivindicación de calter claramente social y apartidista".