La demanda d'oficialidá torna a tomar les cais

La XDLA entama la yá tradicional marcha n'Uviéu pol Día de les Lletres Asturianes.

Casi un mes depúes de la manifestación en Xixón baxo los lemes 'L'asturianu llingua oficial ¡agora!' y 'El gallego-asturiano oficial ¡agora!', la sociedá asturiana torna a salir a la cai pa reclamar los sos derechos llingüísticos. La convocatoria va salir de la Estación del Norte d'Uviéu a les 19.30 hores y va acabar énte'l Teatru Campoamor, onde va lleese'l discursu final entantes de la celebración de la xunta estraordinaria de l'Academia de la Llingua Asturiana por cuenta del XL Día de les Lletres Asturianes, onde la institución va recibir como académicos a Pablo Texón y Alberto Fernández Costales.

"La oficialidá ye'l reconocimientu llegal del derechu que tien cualquier persona a usar llibremente la llingua propia d'un territoriu. La oficialidá ye un avance democráticu porque amplía derechos y llibertaes ciudadanes. N'Asturies tenemos dos llingües propies, l'asturianu y el gallego-asturiano, y los sos falantes nun tienen reconocíu llegalmente esi derechu. Si les nuestres llingües son como les demás llingües del Estáu, ¿por qué los sos falantes tienen menos derechos que los falantes d'otres comunidaes? Queremos el mesmu tratu institucional y el mesmu réxime de protección que tienen les demás llingües del Estáu", demanda la Xunta pola Defensa de la Llingua Asturiana (XDLA), convocante de la manifestación.

Esta organización considera que "nun ye ético tener más tiempu esta situación indigna pal nuestru patrimoniu cultural: si somos conscientes de la situación de desigualdá nun se pue esperar más. Hai que reformar l'Estatutu d'Autonomía p'aprobar la oficialidá y depués, con una Llei de Normalización". Poro, pide a los partíos políticos que conformen la Xunta Xeneral na llexislatura viniente que pongan "remediu a un déficit democráticu que lleva demasiaes décades pendiente".