La delda de les eléctriques españoles favorez a HC

Les tres grandes eléctriques españoles, Iberdrola, Fenosa y Endesa, lleven toa esta selmana anunciando que van dexar pa prau, cuando non cancelar dafechu, inversiones en nuevos grupos eléctricos de xeneración que teníen pensao echar a andar esta década. La esplicación oficial pa estes desinversiones ye'l pufu por importe de 43.428 millones d'euros qu'arrastren estes compañíes a cuenta de les inversiones que ficieron n'América del Sur y nel sector de les telecomunicaciones, un índiz de delda descomanáu que nun-yos dexa metese n'obres y que-yos obliga a aforrar 6.000 millones que dicen van salir de los planes d'espansión. Con ello peligra el que se construyan bien de centrales, les más d'elles de ciclu combináu a gas en tola península que s'espeyaben nel plan estratéxicu que remanaba'l Ministeriu d'Industria 2002-2011. Esti plan criticose muncho dende medios asturianos porque nel nun se teníen por prioritaries les centrales térmiques qu'HC tenía anunciaes p'Asturies, un grupu a gas en Soto y otru a carbón n'Aboño. Como Asturies yá produz más corriente de lo que gasta y nun hai llinies d'alta tensión coles que poder esportalo, el Ministeriu consideró que los proyectos p'Asturies yeren de prioridá "baxa" lo mesmo los d'HC que'l de Fenosa en Cangas o la más en dulda central nueva d'Iberdrola en Lada. Coles anuncies de les tres grandes, los planes d'HC parez que vuelven a garrar puxu, ya que la cuarta eléctrica española, anque tien una delda de 2000 millones d'euros, tampoco nun pasa, nin con muncho, peles apretures de les tres hermanes mayores, y podría ponese con grupos nuevos. Sicasí, tampoco hai qu'escaecer que l'anuncia de les tres grandes faise con interés en cuantes que les eléctriques tan discutiendo col gobiernu pola xuba del preciu de la corriente que quieren poner pal añu qu'entra, y tamién en conociendo que yá lleven un añu con un índiz de delda asemeyáu