La cultura del acebache arranca’l camín pa ser declarada Bien d’Interés Cultural de calter inmaterial

El BOPA d’esti xueves anuncia l’apertura del espediente pa declarar la cultura del acebache como Bien d’Interés Cultural (BIC) de calter inmaterial. El procesu pa la so aprobación allargaráse per hasta dos años hasta llegar al Plenu del Conseyu de Patrimoniu.

Algamar esta calificación permitirá una proteición patrimonial a esta industria artesana de nidia relevancia cultural y social dende va sieglos nel país, sobre manera na zona de Les Mariñes, nel conceyu de Villaviciosa. “Resulta claro qu’al acebache se-y da n’Asturies, cultural y socialmente, un valor incontestable que se revela nel so usu a lo llargo de la historia. La so rareza, el so color, el so brillu y su inalterabilidá, asina como les sos supuestes propiedaes, espliquen un apreciu que llegó al sieglu XXI y que xustifica una propuesta de proteición patrimonial al traviés de la declaración de la cultura del azabache como Bien d’Interés Cultural inmaterial”, espón la resolución de la Conseyería de Cultura, Política Llingüística y Turismu.

Los siguientes pasos del procesu van ser la solicitú d’informes a l’Academia de la Historia, la Universidá d’Uviéu y el Real Instituto de Estudios Asturianos (RIDEA) sobre esti material emplegáu sobre manera pa la realización de pieces y xoyes, un acebache únicu nel mundu que rescampla pola so gran calidá. De ser los dictámenes recopilaos favoratibles, el Conseyu de Patrimoniu aprobaría la declaración en Plenu.