La CSI convoca una concentración frente a la RTPA esti martes en solidaridá con un trabayador

L’apertura d’un espediente disciplinariu a un trabayador de la RTPA llevó a la Corriente Sindical d’Izquierda (CSI) a convocar una concentración de protesta frente a la sede del ente públicu en Xixón. Ésta va celebrase esti martes a les 17 hores.
 
“Nstos momentos, un compañeru críticu, comprometíu con un cambiu a meyor na RTPA tanto pa los sos trabayadores como pal espectador, tien abiertu un espediente. El motivo p’abrilu ye la desobediencia a una orde que pon n’entredichu la xestión nefasta y el chanchulléu xeneralizáu de Recursos Humanos. Nesta concentración vamos a esixir el pieslle d’esti espediente”, espliquen dende’l sindicatu. Según denuncien, Manuel Castrillo, direutor de Recursos Humanos del ente públicu, “desarrolló dende la puesta en marcha de la radiotelevisión una política llaboral que fomenta la precariedá y los despidos. Incumple la llexislación llaboral y acompaña la so xestión d’amenaces y represalies destinaes a fomentar el mieu, l’individualismu y la poca solidaridá ente compañeros”.
 
Nun comunicáu, la CSI apuesta por algamar “una RTPA pública que, como mínimo, cumpla la llexislación llaboral vixente. Que trate a les personas que la saquen alantre con respetu y dignidá, valorándolos por igual ensin diferenciar el llugar qu’ocupen na cadena xerárquica y de si formen parte de la plantiya de la TPA o de les empresas subcontrates”. D’igual forma, anima a toles persones que compartan esta visión a que participen na concentración de güei a les 17 hores frente a les instalaciones de la RTPA na Llaboral de Xixón.