La crítica madrileña premia a Xuan Bello

La mesma selmana en que presenta la so nueva obra en castellanu "los cuarteles de la memoria" l'escritor asturianu Xuan Bello recibió ayeri una llamada de teléfonu que-y confirmaba la entrega del premiu Villa de Madrid "Ramón Gómez de la Serna" pol llibru que lu dio a conocer énte'l públicu castellanu "Historia Universal de Paniceiros".

El premiu, que concede l'Ayuntamientu de Madrid, tien una dotación de 12.000 euros y reconoz tolos años a la meyor novela de la temporada. Ente los ganadores de los últimos años destaquen Luis García Martín, que lu ganó nel 2.000 por "La muerte de Tadzio" o l'asturianu José Avello, que ganó nel 2.002 pola novela "Jugadores de Billar"

Esti ye'l primer premiu que recibe fuera d'Asturies Xuan Bello (Paniceiros-Tinéu 1965), un autor que lleva espublizaos más de venti llibros n'asturianu dende 1.982, d'ente los que salió la cadarma pa esti mesmu "Historia universal de Paniceiros" que Debate asoleyó en castellanu nel 2.002 y del que'l públicu asturianu yá conocía les más de les sos histories al traviés d'obres como "La memoria del mundu" (Llibros del Pexe 1998)

El premiu garró de sorpresa a Xuan Bello, que nun contaba con ello, sobremanera en cuantes que nun ficiere promoción nenguna del llibru nos ambientes lliterarios madrileños. Xuan Bello sorrayó que-y llamaba l'atención que la crítica y el públicu castellanos reconocieren obra que saliera de mano n'asturianu, lo que diz muncho del bon momentu de la nuestra lliteratura.

El premiu coincide cola apaiciónde la nueva novela de Xuan "Los cuarteles de la memoria" que supón la continuidá del apueste de la editorial Debate pol narrador asturianu. La obra va presentase mañana en Paniceiros, el pueblu del escritor, nun acontecimientu nel que van tar presentes periodistes de los principales medios de comunición escritos estatales.