La crisis n’IX lleva al cese de Francisco Asís en Seguridá Pública

El Director Xeneral de Seguridá Pública Francisco Asís Fernández cesó ayeri nel so cargu dientro de la Conseyería de Xusticia, Seguridá y Rellaciones Esteriores, nel que lu sostituye Ramón Argüelles, antiguu conceyal d'IX en L.lena.

La francedura interna n'Izquierda Xunida, que se manifestó yá n'amenaza de de la executiva federal del PCE de desautorizar el pasáu congresu del Partíu Comunista d'Asturies, cobróse ayeri la so primer víctima dientro de la cadarma política del gobiernu asturianu. El protagonista de los fechos foi Francisco Asís, Director Xeneral de Seguridá Pública y miembru de la corriente venceyada a Francisco Frutos, mayoritaria nel PCE pero opuesta a la tendencia mayoritaria n'Izquierda Xunida N'Asturies, que lideren Jesús Iglesias al frente d'IX y Noemí Fernández na dirección del PCA, formación mayoritaria na coalición IX. El Conseyeru de Xusticia Javier Valledor, que llevó'l cese d'Asís al Conseyu de Gobiernu d'ayeri, xustificó la decisión, que propunxere la mesma directiva d'Izquierda Xunida d'Asturies, por evitar que la dixebra interna nel partíu repercutiere nel llabor del Gobiernu.