La crisis d’Andecha Astur repercute nes mocedaes de la organización

Les agrupaciones d'Avilés, Corvera y Uviéu de Darréu, les mocedaes del partíu políticu Andecha Astur, emitieron ayeri un comunicáu de prensa en qu'amuesen públicamente'l so respaldu a la Xunta Executiva llexítima d'Andecha Astur, encabezada por Germán Abad y escoyida nel conceyu nacional celebráu en Candás en mayu del 2006, y nel que denuncien "l'interés en facer a Darréu complice de les actidúes golpistes d'una minoria de la militancia d'Andecha Astur".

Nel so comunicáu, estes trés agrupaciones locales aseguren qu'existe un "intentu d'utilizar a Darréu p'afondar na inestabilidá interna qu'anguaño esiste n'Andecha Astur"
Dalgo que ye pa los miembros Darréu "daqué inaceptable cuando la mayoria de la militancia de la nuestra organización nun ye militante d'Andecha Astur y tien un total desconocimientu del fondu de lo que ta pasando".


Los conceyos d'Avilés, Corvera y Uviéu denuncien "intentos d'espulsión a dellos militantes por motivos de cuotes, cosa qu'enantes nunca pasara y más cuando dichos militantes nun recibieron nengún apercibimientu personal de que nun teníen les cuotes al dia" una circunstancia que califiquen de "ocurrencia oportunista pa quitar del medio a dellos militantes". Otra de les denuncies d'estos conceyos de la organización son les amenaces d'espulsión a otros militantes "pol simple fechu d'asistir a les Xuntes Nacionales llexítimes d'Andecha Astur" dalgo que alifiquen de "actitú facista". Dende estes tres agrupaciones locales de Darréu, llamenten "los enfotos de dalgunos militantes de la nuestra organización, que tamién lo son d'Andecha Astur" y que tan vinculaos al que califiquen de "sector golpista" en referencia a la executiva del partíu políticu llegalizada por un sector del partíu encabezáu por Arturu Bermeyu y que tamién defende la so llexitimidá al frente de la organización.