La creatividá y la variedá marquen el V Samartín de les Tortielles

Dende'l vienres y hasta'l domingu, 29 chigres de Samartín del Rei Aurelio participen nesti certame gastronómicu qu'emplega l'asturianu en cartelería y promoción. Les tortielles tienen un preciu únicu de 1,50 euros, qu'asciende a 3,10 con una cerveza.

Nel V Samartín de les Tortielles podrán degustase 29 creaciones diferentes y orixinales, con ingredientes tan variaos como oriciu, bacaláu, pulpu, gambes y gula, llagostín o calamares, amás de tortielles con carne de güe, carrellera ibérico, llacón, compangu o callos, picadiellu y xamón, tando dalgunes d´elles complementaes con setes, xampiñones, pimientos del piquillo o diferentes quesos, incluso con guindilles, espárragos, mazanes o plátanos.

Pa que los veceros puedan organizase, Empresarios y Comerciantes de San Martín del Rey Aurelio (ECOSAM) edita gastromapes col asesoramientu de la Oficina de Política Llingüística de Samartín del Rei Aurelio con tolos establecimientos de Sotrondio, Blimea y L'Entregu que participen nel certame. San Miguel ye la empresa que collabora nesta edición de Samartín de les Tortielles.