La creación de la especialidá docente entra nuna fase de parálisis

Genaro Alonso insiste na creación de la especialidá docente de Llingua Asturiana y Gallego-asturiano dende Asturies siguiendo la tesis del ministeriu de que nun ye competencia de so, anque Madrid reconoz dificultaes pa la so reconocencia posterior. Señala que nun esiste precedente al nun ser l'asturianu oficial. Habrá otra reunión n'abril.

La falta d'oficialidá continúa enrevesando'l procesu de creación de la especialidá docente. La selmana pasada'l conseyeru d'Educación y Cultura acudía a Madrid pa participar na primer reunión de la comisión de trabayu entamada xunto col Ministeriu d'Educación y Cultura pa desbloquiar la citada especialidá, pero nun hebo avances sustanciales.

Alonso insistió na so tesis d'ellaborar una decretu autonómicu que permitiría poner en marcha la especialidá, dalgo qu'el secretariu d'Estáu d'Educación, Formación Profesional y Universidades, Marcial Marín, y el direutor xeneral d'Evaluación y Cooperación Territorial, José Luis Blanco, consideren como una opción, aunque alvierten de posibles dificultaes pal so posterior reconocimientu estatal. Madrid argumenta que, al nun ser l'asturianu oficial, trátase d'una novedá y nun hai precedentes.

"El ministeriu digamos qu'almite la creación d'esa especialidá, pero plantega dificultaes pal so reconocimientu posterior al ser necesaria esa valoración y reconocimientu modificando los reales decretos qu'afiten les especialidaes" docentes d'Infantil, Primaria y Secundaria, esplicó Alonso. "Como nesti puntu tamos, creímos oportuno una segunda reunión de trabayu de la comisión téunica, que se celebrará'l 20 d'abril, tamién en Madrid, pa siguir avanzando na llinia plantegada y defendida por esta comunidá autónoma", avanzó.

Postura de l'ALLA

L'Academia de la Llingua Asturiana (ALLA) caltién nesti asuntu una postura distinta a la defendida pola conseyería. La so presidenta, Ana María Cano, yá defendió en delles ocasiones que la creación de la especialidá docente tien que se facer con una modificación del decretu estatal d'especialidaes.

Ésti debería permitir la inclusión de llingües non oficiales pero con reconocimientu xurídicu pa nun dexar asina  a los docentes con una reconocencia inferior a los del restu de les asignatures, según sostién Cano.