La COVID-19, yá declarada pandemia, provoca la primer muerte n’Asturies

Un total de 44 persones tán afeutaes n’Asturies pol coronavirus SARS-CoV-2, que yá rexistró la so primer vícitma por COVID-19, declarada esti miércoles pandemia pola Organización Mundial de la Salú (OMS). La Conseyería de Salún mandó atrancar tolos centros educativos non universitarios d’Uvieú per 14 díes dende’l vienres.

Avelino Uña, salesianu de 68 años qu’exercía de xefe d’estudios nel colexu de la Fundación Masaveu y contaba con patoloxíes previes, ye la primer persona finada nel país por COVID-19. Ingresó’l llunes nel Hospital Universitariu Central d’Asturies (HUCA) y na tarde d’ayeri confirmábase la so muerte.

Esti centru uvieín ye ún de los principales focos del coronavirus n’Asturies, yá que 29 de los 46 casos conocíos tán venceyaos al mesmu. Por esti motivu dende’l martes xunto a otros trés centros del conceyu, Santo Domingo de Guzmán y Santa María del Naranco, y el moscón Ramón Areces, les clases tán suspenses.

Otra manera, el Santo Ángel d’Avilés peslló güei por cuenta d’un positivu d’un alumnu y el Gobiernu d’Asturies decidió que dende mañana toles escolines y escolinos d’Uviéu, asina como de centros d’enseñanza p’adultos o d’idiomes, nun vayan a escuela de manera preventiva per 14 díes. La Universidá d’Uviéu, mentes, sigues coles clases, a esceición del campus del Milán depués de que se-y diagnosticara COVID-19 a una estudiante italiana d’Erasmus na Facultá de Filosofía y Lletres.

Más de 118.000 casos en polo menos 114 estaos

La OMS declaró ayeri la enfermedad COVID-19 como una pandemia, esto ye, una epidemia que s’esparde per munchos estaos. Polo menos son 114 los que tienen casos de coronavirus, sumando más de 118.000 positivos, según los datos d’esti organismu de Naciones Xuníes.

El so direutor xeneral, Tedros Adhanom Ghebreyesus, quixo mandar un mensaxe de tranquilidá, anque demandó a los estaos “qu’adopten midíes urxentes y agresives” pa frenar la espansión del SARS-CoV-2. “Ésta ye la primer pandemia causada por un coronavirus”, pero “al empar, enxamás viéramos una pandemia que pudiera ser controlada”.

Na imaxe, un momentu del Conseyu de Gobiernu celebráu esta mañana. Semeya obra d'Armando Álvarez.