La Coordinadora presenta un recursu de reposición pola amplicación de la cantera del Naranco

L’impactu ambiental altu de l’ampliación de la cantera del Naranco llevó a la Coordinadora Ecoloxista a presentar un recursu de reposición ante Industria. El coleutivu señala qu'Arcelor vien inclumpliendo les llabores de restauración.
 
Según afirmen dende esta agrupación ecoloxista, l’actual mou d’esplotación d’Arcelor-Mittal “nun favorez la reducción del impactu paisaxísticu, nin posibilita la restauración y apantallamientu de los bancos una vegada escosaos. Bona prueba d’ello ye la falta de recuperación paisaxística de les zones esplotaes na cantera actual”. Ente los munchos problemes que causa esta esplotación, la Coordinadora destaca que l’actividá na mesma dificulta la presencia d’especies habituales na zona y que, amás, afecta a L’Aguañaz, acuíferu del que se capta agua pal abastecimientu de Llanera. “Na esplotación actual pue comprobas cómo nun esisten canales o cunetes perimetrales con capacidá suficiente pa recoyer les agües pluviales y d’escorrentía y evitar la so entrada dientro del área n’esplotación”, aseguren los ecoloxistes al respeutu.
 
Por estes razones, y por otres molesties que tamién afeuten a los vecinos, como’l pasu continuu de camiones y el ruíu que xenera l’actividá de la cantera, la Coordinadora Ecoloxista d'Asturies espera que la Conseyería d’Industria y Emplegu –na actualidá, Economía y Emplegu– “atienda’l nuesu recursu y paralice esti disparate nuevu nel Naranco”.