La Coordinadora presenta alegaciones contra’l basureru d’Asturiana de Zinc en Xixón

“Les deficiencies numeroses” del proyeutu d’Asturiana de Zinc pal basureru nuevu de residuos de la compañía en Carbaínos llevó a la Coordinadora a presentar alegaciones al trámite d’autorización ambiental integrada. Esti basureru va almacenar ‘jarofix’.
 
Esti material va viaxar dende San Xuan, en Castrillón, hasta la parroquia de L’Abadía Cenero, onde Asturiana de Zinc decidió asitiar el basureru de residuos. La instalación, que recibió munches crítiques vecinales, tien una capacidá d’almacenar 560.000 tonelaes al añu d’esti mineral de sulfatu de fierro que se produz como subproductu nel procesu de fabricación del cinc, y que puede suponer un riesgu pa la salú pública y el mediu ambiente cola absorción de materiales pesaos na so estructura.
 
Ente les munches deficiencies que lleven a la Coordinadora Ecoloxista d’Asturies a alegar contra esti basureru, destaquen que la empresa nun cumple’l puntu 10 de la Declaración d’Impactu Ambiental del 2010 pa l’ampliación de la fábrica de San Xuan, onde Asturiana de Zinc se comprometía a investigar soluciones alternatives al ‘jarofix’; nun presenta alternatives al baseru de Carbaínos; nun se detalla cómo se va minimizar la contaminación acústica, el tráficu de camiones, la contaminación del aire o la perda de calidá paisaxística; y nun se señala cómo van solventase los problemes que yá tien el basureru actual d’inertes.