La Coordinadora esixe un estudiu ampliu d'impautu al proyeutu de cría de moxones en Caravia

Mar Abierto Mejillones del Cantábrico quier instalalu frente a Punta Escalar.

La Coordinadora Ecoloxista d'Asturies amuesa la so sorpresa pola decisión de la Conseyería de Desarrollu Rural y Recursos Naturales de volver "a permitir el trámite reducíu ambiental del proyeutu pa la cría marina de moxones frente a Punta Escalar", recordando que dichu proyeutu "refugóse na su ubicación de Cabu Bustu en Valdés, con un rechazu total de la ciudadanía de la zona y de la Federación de Cofradías de Pescadores de Asturias, a pesar de que la empresa anunciaba la creación de 100 puestos de trabayu y de que'l direutor xeneral de Pesca Marítima del Principáu anunciara qu'a Ḷḷuarca tocara-y la llotería con esti proyeutu". Al respeuto, los ecoloxistes apunten que "nun sabemos si en Caravía tamién-yos tocara la llotería o será namái la pedrea".

Dende la organización destaquen "la incompatibilidá de la planta de cría de muxones que pretende instalase col caltenimientu de l'actividá pesquera de la zona pola proximidá a caladeros que se van ver afeutaos polos residuos orgánicos del moxón y pola afeición que pue producir l'esgüeve", que tamién pue perxudicar "a otres especies como'l percebe", ente otros peligros. "Hai qu'estudiar con detalle l'impautu que pueda suponer na biodiversidá de la zona, que se pue ver afeutada polos efeutos de la cría industrial del muxón, desplazando a otres especies", alvierten al tiempu qu'avancen que van esixir "un estudiu ampliu d'impautu ambiental que determine si ye vidable o non l'emplazamientu propuestu de Caravia, una vez que se refugó l'orixinal de Cabu Bustu en Valdés".