La Coordinadora Ecoloxista reclama la veda de la pesca d’angula

L’aumentu de la temporada de pesca d’angula reclamáu polos anguleros de les cofradíes de L’Arena y Cuideiru, foi criticáu pola Coordinadora, que reclama una veda inmediata. Tamién denuncia que’l Gobiernu “quier acabar col salmón”.
 
Los ecoloxistes señalen que los profesionales de la pesca de l’angula, “tres ver la propuesta irracional de normativa de pesca d’agües continentales qu’intenta por tolos medios condenar al esterminiu al salmón atlánticu, al menos n’Asturies, y que foi contestada pola gran mayoría de les organizaciones ecoloxistes y asociaciones de pescadores”, intenten tamién aprovechase de la permisividá del Gobiernu “viendo los aires que soplen agora dende’l Principáu d’Asturies”. La Coodinadora Ecoloxista d’Asturies diz nun entender que la pesca de l’anguila, l’adultu de l’angula, “tea vedada de manera permanente dende hai bastantes temporaes en toles agües asturianes pa pesca recreativa y que, por contra, tea permitida la pesca profesional y con artes profesionales de la so cría”.
 
“La demostración d’esta irresponsabilidá ye l’amenorgamientu de les captures año tres año d’angules y la escasez, cada vegada mayor, d’anguiles nos nuesos ríos, tando condenada la especie a la estinción más o menos cercana si la conseyería correspondiente nun ye quien a anteponer dalgún día los intereses de la especie sobre los intereses comerciales obtusos, egoístes y mui a plazu curtiu d’unos pocos, lo que, ensin dulda, llevarános a que desapaeza, al igual que yá lo fixo na mayor parte del Ebro, Duero y Tajo”, continúa’l comunicáu de la Coordinadora. Por esti motivu, los ecoloxistes consideren que “non sólo nun se deberíen aumentar les xornaes de pesca de la temporada, sinón que se deberíen vedar por completo les capturas de l’angula, al menos hasta que la so recuperación resulte evidente y la so pesca sostenible, tal y como fixeron n’otres comunidaes autónomes como l’andaluza, onde se vedó la so captura per 10 años”.
 
El salmón, tamién en peligru
 
La Coordinadora Ecoloxista d’Asturies foi crítica tamién cola Norma Reguladora d’Agües Continentales espublizada’l llunes nel BOPA, a la que califica de “disparate ambiental”. Ésta ta retocada con respeuto a la propuesta presentada nun primer momentu “que yera tovía más permisiva”.
 
Nella permítese la pesca del salmón “118 díes” polos 55 de la temporada última, concediendo un día de descansu a la selmana polos dos del 2011, lo que pa los ecoloxistes “ye un despropósitu”. Amás, el cupu por pescador va ser de dos salmones selmanales, lo que daría la posibilidá d’echar a tierra 40 en tola temporada, una cifra mui superior a la d’esta temporada, onde se permitíen 3 en tola campaña. “El Principáu quier acabar esti añu col salmón”, asegura esti coleutivu.
 
“Entendemos que les cifras de salmones pescaos nes campañes últimes son bastante alarmantes como pa tomar midíes conservacionistes y non les propuestes pol Principáu que ponen en peligru los peces de los ríos”, señalen los ecoloxistes, qu’apunten que “Foro namái ufre midíes a plazu curtiu pa satisfacer a los pescadores depredadores, ensin pensar na conservación y el futuru d’Asturies, y nos pescadores conservacionistes, que tamién hai”. “Si nun se tomen midíes radicales, tanto a plazu curtiu como de futuru, ta poniéndose en peligru esta especie emblemática. Nun podemos permitir que los caprichos de los políticos pescadores acaben cola diversidad biolóxica de los ríos asturianos”, fina la Coordinadora.