La Coordinadora Ecoloxista reclama la paralización d’unes obres qu'afeuten al teixu de Parmu

El teixu de Parmu, nel conceyu de Teberga, ta en peligru seriu por unes obres que tán faciéndose nel pueblu. Dende la Coordinadora Ecoloxista d’Asturies reclamen al Gobiernu que paralice los trabayos.
 
Esti árbol de 360 centímetros de cuerda, ún de los más impresionantes y meyor conservaos del páis, ta asitiáu xunto a la ilesia de San Xusto y a metros escasos d’una obra que podría afeutalu, según denuncien los ecoloxistes. “Estes obres que tán faciéndose ponen en peligru la conservación d’esti texu tan singular y supón la vulneración del Decretu 145/2001 de Plan de Manexu del Texu espublizáu nel BOPA del pasáu 31 de marzu del 2003”, señala la Coordinadora.
 
Esta normativa, que protexe a estos árboles centenarios, señala que “s’evitarán aiciones qu’aumenten l’artificialidá del entornu” –amás d’obligar a la llimpieza del llugar–, como pue ser la escavación, pavimentación o asfaltáu alredor del exemplar o la descarga de cualisquier material sólidu o líquidu. “Esperemos que’l Principáu nuevu atienda esta petición razonada y que garantice la conservación d’esti texu singular que lleva cientos d’años viviendo y que ve los sos díes amenazaos por una xestión mala”, relamen los ecoloxistes.