La Coordinadora Ecoloxista presenta alegaciones contra l’ampliación de la cantera de La Llamazona

La Coordinadora Ecoloxista d’Asturies ta acabante de presentar alegaciones pol trámite nuevu d’ampliación de la cantera de La Llamazona. Dende l’asociación aseguren que, d’autorizase, provocaría un cráter de fuerte impautu ambiental.
 
Los ecoloxistes sorpréndense de que solo dos años depués de l’ampliación última d’esta cantera situada nel monte Coya, la empresa solicite un trámite nuevu pa “profundizar más na ubicación actual, baxando 30 metros de la cota autorizada, de los 280 metros a los 250, lo que xeneraría un cráter importante nel monte, colos riesgos asociaos y la dificultá de la recuperación paisaxística posterior cuando concluya la esplotación”. A esta situación, súmense una serie de denuncies presentaes pola Coordinadora l’añu pasáu contra la compañía por incumplimientu “de les condiciones ambientales impuestes na so ampliación última”, polo que reclama al Gobiernu que revise estes cuestiones enantes d’autorizar l’ampliación.
 
Ente estos incumplimientos, a xuiciu del coleutivu ecoloxista, ta l’ausencia de pantalles vexetales perimetrales na zona de vientos predominantes na esplotación y de cunetes de guarda, amás d’un númberu insuficiente de canales perimetrales pa la recoyida del agua que nun conecten con nengún sistema de meyora de les agües. Tampoco ye adecuada la valla cinexética pa impedir el pasu d’animales a la esplotación, yá qu’ésta namás ta co colacada nuna parte del recintu, y los ecoloxistes echen en falta trabayos de restauración y integración medioambiental que minimicen l’impautu de la cantera de La Llamazona.
 
Por ello, la Coordinadora espera que “el Principáu nuevu esixa ensin tardanza estes midíes ambientales pa reducir l’impautu ambiental fuerte de la cantera, y investigue les razones poles qu’esistió esta permisividá dende Mines y Mediu Ambiente con estos incumplimientos ambientales nesta esplotación y n’otres del estilu n’Asturies”.