La Coordinadora Ecoloxista pide una investigación sobre la retirada de los datos de 13 sonómetros

|

La retirada de los datos de 13 sonómetros llevó a la Coordinadora Ecoloxista a pidir a la Fiscalía de Mediu Ambiente una investigación sobre esta decisión de la conseyería. Estos aparatos sirven pa midir la contaminación acústica.
 
Los 13 sonómetros de la Rede d’Estaciones de Control de la Contaminación d’Asturies afectaos por esta aición de la Conseyería de Mediu Ambiente, Ordenación del Territoriu y Infraestructures son cuatro de Xixón (los situaos en Constitución, Arxentina, Hermanos Felgueros y Castiella) y Uviéu (Palaciu Deportes, plaza de toros, parque Purificación Tomás y Trubia), ún d’Aviles (plaza la Guitarra) y los de Mieres, Llugones, Cangas del Narcea y Samartín del Rei Aurelio. “Al eliminar les series históriques qu’ofrecíen los sonómetros, el Principáu dificultó’l siguimiento y los estudios científicos sobre la contaminación acústica que se produz n’Asturias y los efeutos pa la salú”, esplica la Coordinadora Ecoloxista d’Asturies nun comunicáu.
 
La escusa dada pola conseyería, según detallen dende’l coleutivu, foi que los sonómetros medíen el ruiu que los equipos de refrixeración de les estaciones producíen, “lo que resulta cuando menos sorprendente, porque non toles les estaciones daben les mesmes midíes. Otres del resto d’España tienen los mesmos sonómetros y publíquense los sos datos”. La Coordinadora recuerda que la contaminación acústica ye perxudicial pa la salú de les persones y que nes ciudaes asturianes supérase’l nivel sonoru establecíu pola llei y, inclusive en dalgunos puntos, el marcáu pola Organización Mundial de la Salú como llímite de tolerancia al ruíu, situáu en 65 decibelios.
 
L’asociación ecoloxista espera agora que la Fiscalía de Mediu Ambiente investigue esti asuntu cola fin de que’l Gobiernu d’Asturies “reponga los equipos de midía pa conocer los problemas de contaminación acústica que venimos sufriendos” los asturianos.

Contador Estadistiques