La Coordinadora Ecoloxista denuncia vertíos peligrosos en Pion

Unes 1.500 toneales d’escories salines procedentes d’una empresa de Somonte vertiéronse nuna finca non autorizada pa residuos peligrosos asitiada en Pion. La Coordinadora señala qu’estos materiales pueden afeutar al ríu España.
 
El coleutivu ecoloxista denunció esta situación ante la Fiscalia de Medio Ambiente, la Viceconseyería de Medio Ambiente y La Confederación Hidrográfica cola intención de que s’investigue esta situación y que s’informe sobre qué midíes van tomase pa restaurar la parcela maliaya afeutada y evitar que l’agua filtrada por estos materiales pueda llegar al ríu España provocando un impautu fuerte nes sos agües y fauna. Según informaciones de la Coordinadora Ecoloxista d’Asturies, esta parcela de Pion recibió 1.500 tonelaes de residuos tresportaos dende una empresa del conceyu vecín de Xixón que, “d’acuerdu al so estudio d’impautu ambiental, namái xenera como residuu estes escories salines consideraes peligroses”.
 
“El tresporte fixóse en 10 camiones que realizaron dellos viaxes un sábadu pela mañana ente Somonte y Pion, ensin qu’a los camioneros se-yos informara que diben a tresportar mercancíes peligroses, pa lo que dalgunos nun tienen autorización, como nos confirmaron”, señalen los ecoloxistes. Esti treslláu producióse l’añu pasáu con destín final nuna “finca non autorizada pa residuos peligrosos, en concreto un aparcamientu de camiones nel barriu de Casa Mori en Pion”. A pesar del tiempu trescurríu, la Coordinadora asegura que “tovía vense partes de les escories nel rellenu del aparcamientu” y muestra la so preocupación pola posibilidá de qu’estos residuos puedan llegar a afeutar al ríu España.