La Coordinadora Ecoloxista denuncia la segunda balsa de Río Narcea en Miranda

La empresa minera Río Narcea Gold Mines quier complementar les instalaciones de que dispón pal llavao de minerales nes sos mines del occidente asturianu con una segunda balsa pa guardar nella la basa que-y queda a la empresa dempués de la llimpieza del mineral qu'estrae de les sos mines asturianes y de lo que procesa d'otra mina en Groenlandia.

La Coordinadora Ecoloxista d'Asturies compareció en periodu d'información de l'autorización ambiental pal proyectu d'esta balsa, que tendría d'asitiase en conceyu de Miranda y pa la que'l grupu conservacionista pide que se-y deniegue la llicencia . La coordinadora llama l'atención sobre'l fechu de que cuando nel 1996 se-y dio autorizacion a la empresa pa la primer balsa, ello foi cola condición de que namás diba tratase nella la basa resultante de tratar el mineral asturianu, non el d'importación, ello colos riesgos que lleva arreyao y cola molestia que supón el trasiegu de más de 1.500 camiones que carreten el mineral ente la planta de tratamientu asitiada en Cangas del Narcea y el puertu d'Avilés.

Les característiques contaminantes de la basa resultante son especialmente peligroses al dicir de la Coordinadora, en cuantes que Río Narcea Gold Mines emplega un métodu de llimpieza por cianuración que yá ta prohibíu o desaniciáu n'estaios como Turquía, Grecia, la República Checa y dellos estaos de los EEUU. Ello cuando se ta falando d'una balsa que va tar asitiada no cimero de la cuenca del Narcea, que da agua a cerca de 100.000 persones y teniendo en cuenta, como sorraya la Coordinadora que, mientres la primer balsa s'asitiaba en piedra cuarcítica impermeable, esta va facese sobre una camada de caliza poroso. Esta circunstancia pon la balsa de basa al dicir de la Coordinadora, fuera de la Llei d'Agües, que prohibe los llabores que puedan dañar manantiales y capes freátiques.