La Coordinadora Ecoloxista d'Asturies solicita la paralización del parque eólicu de Carceda

Les irregularidaes atopaes pola Coordinadora Ecoloxista d’Asturies na memoria presentada énte Medio Ambiente lleva a esti coleutivu a solicitar la paralización del parque eólicu de Carceda. Ésti ye ún de los 90 previstos nel occidente.

Asitiáu en Pravia, na llende colos conceyos de Salas y Cuideiru, la previsión d’esti parque eólicu ye que tea formáu por ocho molinos de 3 megavatios con un altor de más de 160 metros. Según espliquen los ecoloxistes, esisten munches irregularidaes na memoria entregada a la Conseyería de Fomentu, Ordenación del Territoriu y Mediu Ambiente, como nun presentar emplazamientos alternativos, tal como esixe la llei, o sobrestimar los beneficios que traería a les poblaciones de la redolada la instalación del parque nel llugar. Tampoco nun se tien en cuenta l’efeutu de contaminación electromagnética asociada a les llinies llétriques d’evacuación nin se valora l’impautu que supón llevar les torres eóliques a la zona, yá que’trazáu actual nun permite’l tránsitu de tresportes especiales y la maniobralidá de pieces como les previstes.

N’opinión d’esti coleutivu, ye necesario la realización d’una Evaluación d’Impautu Ambiental enantes d’entamar el proyeutu, asina como correxir la gran cantidá de carencies que presenta la memoria. Otra manera, dende la Coordinadora recuerden qu’anguaño hai 90 parques eólicos previstos nel occidente del país que, de salir alantre, provocaríen un efeutu acumulativu al qu’hai que sumar les consecuencias de les llinies d’evucuación y de les subestaciones. Por ello reclama al Gobiernu l’entamu d’una Evaluación Ambiental Estratéxica conxunta, tal como establecen les normatives comunitaries.