La Coordinadora Ecoloxista d'Asturies denuncia una mengua importante de la viesca autóctona

|

Tres estudiar los datos del Cuarto Inventario Nacional qu’espubliza’l Ministeriu de Mediu Ambiente, la Coordinadora Ecoloxista d'Asturies detecta una mengua importante de la viesca autóctona. Por contra, medren los ocalitos y los pinos.

Esti documentu trátase d’un estudiu completu que fai’l ministeriu cada década en caúna de les comunidaes autónomes y que proporciona información sobres les viesques y la so evolución dende’l puntu de vista dasonómicu, esto ye, de la so conservación, y ecolóxicu tres un trabayu de campu de dos años. Nel casu concretu asturianu, los datos apurríos por Agricultura, Alimentación y Mediu Ambiente apunten que la superficie arbolao medró cerca del 1 por cientu, pasando de les 448.360 hectárees que marcaba’l Tercer Inventario Nacional, fechu a primeros de sieglu, a les 453.700 d’anguaño, lo que supón que’l 46 por cientu del país ta ocupáu por árboles.

D’eses 453.700 hectárees, 47.908 tán poblaes por pinos, especie qu’aumentó la so presencia en diez años nun 51,1 por cientu, yá que nel tercer documentu ocupaba una superficie de 31.693 hectárees. No que respeuta a los ocalitos, el so crecimientu foi del 15,32 por cientu, al pasar de 52.295 hectárees a 60.311. “Si la superficie de pinos y ocalitos aumentó un 51,1 por cientu y un 15,32 por cientu, de manera respeutiva, y la superficie arbolao total d’Asturies fíxolo namái nun 1 por cientu, quier dicir que la viesca autóctona asturiana disminuyó en 18.891 hectárees nos diez años últimos, dalgo asina como trés veces el bosque de Munieḷḷos”, denuncien dende la Coordinadora Ecoloxista d’Asturies.

Los ecoloxistes consideren grave enforma la medra de la superficie ocupada polos ocalitos, yá que’l Plan Forestal d’Asturies, aprobáu nel 2001, marcaba como oxetivu qu’esta especie d’orixe oceánicu impulsada nel país a mediaos del sieglu XX tuviera una medra gradual hasta llegar a les 61.838 hectáreas nel 2060. “Nestos momentos yá tamos nes cifres previstes pal añu 2.053. Si continuamos a esti ritmu de crecimientu, pal añu 2.060 na costa asturiana nun habrá más árbol que l’ocalitu”, aseguren dende la Coordinadora. Nel casu concretu del pinu, la cifra fixada nel 2060 ye de 93.609 hectárees, tamién escesiva pa esti coleutivu.

Un asuntu “mui esmolecedor”

Y mientres les especies alóctones medren, les autóctones retroceden, quedando lloñe l’oxetivu previstu del Plan Forestal d’Asturies de que les especies del país medren en 113.220 hectáres, dalgo que los ecoloxistes consideren “mui esmolecedor”. “Ensin dulda, los incendios forestales, les infraestructures, les cortes que nun se reponen y la sustitución d’especies autóctones por alóctones son causes determinantes d’esa disminución”, apunten dende la Coordinadora, coleutivu qu’esixe al Gobiernu del país “que proceda a acometer una moratoria real de plantaciones nueves d’ocalitos pa evitar el crecimientu continuu d’esta especie peligrosa”, asina como “un plan de meyora de les viesques autóctones pa evitar el so retrocesu continuu”.

Na semeya, un ocalital.

 

Contador Estadistiques