La Coordinadora Ecoloxista d'Asturies demanda la construcción de la depuradora de Castropol

“La ría del Eo ta contaminada por neglixencia del Principáu”, afirma la Coordinadora Ecoloxista. L’asociación reclama que nos presupuestos próximos tea incluyida la construcción de la proyeutada depuradora de Castropol pa finar cola situación.

“Resulta sorprende que se produza esta situación de contaminación continua nun espaciu protexíu tan significante como la ría, declarada Zona Especial de Proteición d’Aves (ZEPA) nel 1989; Reserva Natural Parcial, pol Principáu, nel 1994; incluyida nel 2004 nen conveniu internacional de RAMSAR y, darréu, na Rede Europea NATURA; y nomada Reserva de la Biosfera nel 2007, por citar namái les normas de proteición  más relevantes”, apunten los ecoloxistes, qu’alvierten de que los organismos internacionales podríen actuar contra’l Gobiernu pola so pasividá nesti tema. Según espliquen dende la Coordinadora Ecoloxista d'Asturies, les agües residuales de la marxe derecha de la ría “nun sufren procesu dalgún de depuración” y l’emisariu actual presenta delles deficiencias.

Por esti motivu, reclama al Executivu qu’incluya nos presupuestos próximos una partida pa la construcción de la depurada proyeutada en Castropol, con un costes de seis millones d’euros. Ésta taría asitiada ente les ensenaes d’A Regueiras y El Torrón, y trataría les agües residuales de los conceyos de Castropol y A Veiga qu’anguaño van parar de manera direuta a la ría.