La Coordinadora Ecoloxista critica’l viaxe de Cogersa pa ver les incineradores de basura de París y Viena

La organización ecoloxista emitió esta mañana un comunicáu en que critica'l desplazamientu organizáu pol Ente de Xestión de Residuos Urbanos d'Asturies a París y Viena, onde van visitase plantes incineradores de basura asemeyaes a la que Cogersa tien proyectada pa Serín. El grupu ecoloxista denuncia qu'ente los convidaos al viaxe nun hai naide que tenga una postura crítica cola instalación.

Son 54 les persones que van dir nel viaxe qu'organiza l'Ente asturianu de Xestión de Residuos d'Asturies, pero la llista de convidaos nun-yos convence a los ecoloxistes asturianos, que dicen que "se convidó a dellos vecinos y a otros non, casu de los miembros de la Coordinadora Ecoloxista que son vecinos de Carreño, Corvera y Llanera" mientres que si van dir vecinos de Tamón, Serín y Ambás.

La organización ecoloxista llamenta que nun se-yos convidare al viaxe ello con tenelo pidío, y recuerda que, énte l'afoguín pola construcción de la incineradora, Cogersa habría mirar más pol cumplimientu de les normatives europees qu'encamienten en primer llugar menguar la producción de residuos y en segundu llugar el reciclau de los mesmos enantes de ponese a quemalos. Otramiente, amás de denunciar l'efectu contaminante de la incineradora, la Coordinadora plantega una cuestión sobre la viabilidá económica de la incineradora, que dicen que supón un coste de 80 euros por tonelada quemada, mientres que los conceyos que-y dan la basura a Cogersa tan pagando anguaño sobre 10 euros por cada 1.000 kilos qu'entreguen.

Afondando na polémica del viaxe, la Coordinadora denuncia que se faigan viaxes a capitales europees cuando hai incineradores muncho más cerca que podríen visitase, citando'l casu de la de Valdemingomez en Madrid, la de Moncada en Cataluña, o la de Zabalbiri en País Vascu, amás de suxerir que se visiten plantes de tratamientu y reciclao de basura alternatives a la incineración como la d'Estella en Navarra, Zaragoza o Barcelona.

La presencia de cargos oficiales del Principáu d'Asturies, ente ellos el Conseyeru de Mediu Ambiente y Infraestructures y de dellos alcaldes tamién sorprende na Coordinadora, "ello cuando la portavoz del Gobiernu Ana Rosa Migoya y l'Alcaldesa de Xixón Paz Felgueroso dixeron que la decisión sobre la incineradora yera de Cogersa y non del Gobiernu asturianu nin de los conceyos".

La Coordinadora remata argumentando que la incineradora que se proyecta p'Asturies ye bien distinta de les de París y Viena, a les que dobla en tamañu, y recuerda que la incineración, amás de más cara y contaminante, ye tamién el sistema que menos puestos de trabayu crea.