La Coordinadora Ecoloxista alerta de la peligrosidá del almacenamientu xeolóxicu de dióxidu de carbonu

La Coordinadora Ecoloxista d’Asturies considera “mui peligrosos” los proyeutos d’almacenamientu xeolóxicu de dióxidu de carbonu. Hunosa ta acabante de presentar cuatro a facer nel territoriu asturianu, dos d’ellos en parte submarinos.
 
El BOPA sacó güei a información pública les solicitúes de permisos d’investigación por parte d’Hulleras del Norte, SA (Hunosa) al amparu de lo establecío na disposición transitoria segunda de la Llei 40/2010 del 29 d’avientu, permitiendo la Conseyería d’Economía y Emplegu l’aniciu de los correspondientes espedientes d’otorgamientu de los nomaos ‘PICO2’’. Por ello, ábrese un periodu d’información pública de dos meses a partir de mañana.
 
Dende la organización ecoloxista espliquen que “el dióxidu de carbono (CO2) ye ún de los gases d’efeutu invernaderu que contribúi en mayor midida al cambiu climáticu causáu pol home y les concentraciones atmosféricas de CO2”, y que los proyeutos d’almacenamientu soterrañu como los que quier entamar Hunosa “conlleven unos riesgos importantes”, más nel casu de los submarinos. La Coordinadora señana que nun se sabe a ciencia cierta cuánto pue aguantar el dióxidu de cárbonu nel subsuelu ensin peligru y que, nel casu de filtración nel mar, podría tener consecuencies catastrófiques pa los seres vivos marinos.
 
“Nun ye entendible que’l Principáu, que vien consintiendo que les empreses emisores trabayen nuna precariedá ambiental evidente, con emisiones perriba de la normativa vixente dende hai munchos años, quiera defender el cumplimientu de Kyoto y al mesmu tiempu que se dean mas derechos d’emisión a quiénes yá incumplen de manera nidia estos niveles y el marcu actual d’emisiones atmosfériques”, critiquen los ecoloxistes. “Ye un sinsentíu esta doble moral de los diferentes Gobiernos de favorecer el siguir contaminando con total impunidá y depués esconder parte d’esa contaminación como si ésta nun esistiera, más colos riesgos que conlleva”, fina’l comunicáu de la Coordinadora.