La Coordinadora Ecoloxista alega contra l’ampliación del areneru xixonés del Fontanón

|

La Coordinadora Ecoloxista d’Asturies refuga l’ampliación del areneru del Fontanón, cerca del núcleu poblacional xixonés d’El Gallinal (Serín). El coleutivu denuncia que la esplotación a cielu abiertu nun cumple cola norma ambiental actual.
 
En concreto, la intención de la empresa propietaria ye ampliar l’areneru en 55.625 metros cuadraos, dalgo que los ecoloxistes piensen que’l Gobiernu nun debería permitir hasta que cumpla cola Declaración d’Impautu Ambiental espublizada nel BOPA del 11 de xineru del 2007. Asina, la Coordinadora atopo hasta doce defectos qu’inclúin nes alegaciones presentaes contra’l proyeutu. Ente éstos destaquen el corte de caminos d’usu vecinal, que’l zarru de la esplotación nun ye completu o l’ausencia d’un programa de control y siguimientu del sistema hidrolóxicu de la zona, que tienen como consecuencia la contaminación del regueru Vilorteo.
 
Dende la Coordinadora  reclamen al Gobiernu qu’obligue a la empresa’l cumplimientu dafechu de la Declaración d’Impautu Ambiental enantes d’otorgar el permisu pa l’ampliación del areneru.

Contador Estadistiques