La Coordinadora critica la llegalización de les obres feches por Industrias Doy en Trubia

|

L’autorización que permite a Industrias Doy-Manuel Morate, S.L. llegalizar 17 fornos na batería B33 y trés descargaderos de carbón foi criticada esti xueves pola Coordinadora Ecoloxista d'Asturies. Afirmen que la empresa trabaya en precario.

Estes infraestructures, según señalen los ecoloxistes, fixéronse de manera illegal y ensín llicencia municipal, “too ello ensin trámite d’ información publica pa quienes venimos alegando y denunciando les irregularidaes d’esta empresa”. “Dende la Coordinadora oponémonos a l’autorización de  17 cámares de la batería B33 y los descargaderos de carbón de coque”, señalen, pa depués recordar que yá un informe municipal del 2004 señalaba qu’éstos construyéronse de forma illegal.

“Como yá comentamos delles vegaes, esta instalación nun ta en condiciones de siguir furrulando nuna zona urbana al presentar un nivel de precariedá ambiental significativu, con importante contaminación nel entornu, tal como se comprobó en delles ocasiones tanto por parte del Conceyu como del Principáu”, qu’agora autoriza esti cambiu “ensin el trámite perceptivu d’infomación pública”. Los ecoloxistes llamenten que’l Gobiernu nun tenga en cuenta les alegaciones de la so organización y de los vecinos de Trubia y que permita facer a la empresa pese a los sos incumplimientos continuos, dalgo que los téunicos de l’alministración llocal y nacional comprobaron de primer mano.

La Coordinadora Ecoloxista d’Asturies considera que la llegalización d’estes infraestructures van trayer más molesties ente los vecinos, yá que l’oxetivu de la empresa con elles ye’l d’aumentar la producción, lo que xeneraría más ruíu, provocaría qu’hubiera más partícules nel aire y mayores emisiones de gases de combustión, ente otres consecuencies.

 

Contador Estadistiques