La Coordinadora critica la falta de preparación d’Asturies pa enfrentase a catástrofes como la del ‘Prestige’

El martes va principiar n’A Coruña’l xuiciu oral pola catástrofe del ‘Prestige’, qu’afeutó a la costa asturiana. La Coordinadora Ecoloxista recuerda la falta de preparación que tien Asturies énte esti tipu d’incidentes, como quedó amosao n’Aboño.

“Depués de diez años vimos, tres lo asocedío esti xunu col arramáu de’Aboño, que siguimos improvisando con estes catástrofes; que nun tenemos la infraestructura afayadiza p’atendeles, téunica nin material”, aseguren dende la Coordinadora Ecoloxista d’Asturies, que llamenta la permisividá de les autoridaes énte les petroleres y multinacionales. Un exemplu ye que “los petroleros monocascu siguen circulando” a pesar de los alcuerdos internacionales al respeuto. La del ‘Prestige’ “nun foi la primer catastrofe, nin será cabera, porque tamos nun sistema económicu con una esencia basada nel consumu creciente y l’espilfarru continuu de recursos non renovables, como ye’l casu del petroleu y los sos derivaos”, critiquen los ecoloxistes, que denuncien que “tamos a la voluntá de los intereses de les multinacionales petroleres que non sólo se salten el derechu marítimu, sinón que lleguen a imponer los sos intereses y decisiones sobre los gobiernos de munchos países”.

La Coordinadora Ecoloxista tamién quier aprovechar l’aniciu del xuiciu del ‘Prestige’ pa recordar cómo afeutó esti desastre ecolóxicu a la costa asturiana. La marea prieta llegó a Asturies n’avientu del 2002, selmanes depués de l’accidente, asocedíu en Galicia'l 13 de payares. Les sos consecuencies tuvieron a la vista de toos hasta’l branu, cuando los bañistes podíen atopar galletes de galipote nes sableres del país. La llegada de fuel a la costa provocó un impautu perfuerte na flora y fauna, sobre manera nes aves marines, contabilizándose más de dos mil exemplares muertos. Tamién los humanos viéronse afeutaos, n’especial los pescadores, operarios y voluntarios que collaboraron na llimpieza de playes –en condiciones precaries–, ensin descartar la posibilidá de la esistencia de petroleu en seres marinos qu’entren na nuesa dieta.

Los ecoloxistes denuncien que namái se llimpiaren les sableres más turístiques y afirmen qu’hai munchos pedreros a los que nun acudió naide y nos que tovía hai suciedá, como’l de Oles (Villaviciosa) o’l d’Oleiros (Cuideiru). “El mar y los sos recursos constitúin un bien non renovable que, nel casu d’Asturies, padez problemes graves de contaminación derivaos de las múltiples instalaciones industriales presentes en tol territoriu y de sistemes de depuración de les agües deficientes o inesistentes. Too ello contribúi a un impautu continuu sobre la biodiversidá marina y la riqueza de los nuesos caladeros. Poro, precísase non sólo de tratar y considerar la llimpieza de playes, pedreros y fondos marinos, sinón tamién de considerar la conservación y recuperación del mar y los sos ecosistemes nel so conxuntu”, afirmen dende la Coordinadora.