La convocatoria d’actos violentos per Internet tendrá pena de cárcel

El ministru del Interior, Jorge Fernández Díaz, anunció que la convocatoria d’actos violentos per Internet tendrá una pena mínima de dos años. D’esta forma, los fiscales podrán pidir prisión provisional a los acusaos.
 
Interior y Xusticia tán trabayando nuna reforma del Códigu Penal na que va incluyise que se tipifique como delitu eses conductes y que la pena mínima que s'imponga a los sos responsables sía de dos años. De lo que se trata ye d'intentar  facer frente a una violencia urbana que considera que ta coordinada de primeres y que, per mediu de téuniques de la guerrilla urbana, causa "una violencia grande" sobre les persones y los bienes, según señaló Fernández Díaz. Darréu comentó que se trata d'un fenómenu que se vio en Catalunya mientres la xornada de fuelga del 29 de marzu pasáu, pero que tamién se rexistró n'otres ciudaes del Estáu, "que se ta xeneralizando" y que "nun tien una respuesta afayadiza" dende l'orde públicu.
 
La intención del Gobiernu ye tamién poner frenu a la resistencia pacífica –como’l ministru define l'actuación d'aquelles persones que desobedecen "de forma repitida” les indicaciones de les Fuerces y Cuerpos de Seguridá del Estáu–, tampoco tipificada “de manera afayadiza”, na so opinión. "Hai que reforzar l'autoridá lexítima de los que lexítimamente tienen la esclusividá de l'actuación con fuercia, que son la Policía Nacional, la Guardia Civil y les policíes autonómiques”, continuó Fernández Díaz, “porque nun se pue tar pasivu ante actuaciones de delles persones que desprecien, insulten y desobedecen a les Fuercies de Seguridá".